Kanë nisur sot punimet për rikualifikimin e qendrës historike të qytetit të Vlorës, ku u mbajt një aktivitet, i cili u transmetua drejtpërdrejt në faqen e kryeministrit Rama.
Ky i fundit, gjatë fjalës së tij, tha se ka një investim prej 11 milion eurosh, që do i kthejnë Vlorës zemrën: Fondi Shqiptaro-Amerikan i Zhvillimit AADF do të investojë 4 mln euro, ndërsa qeveria shqiptare 7 mln euro.
FJALA E RAMËS:
Jemi mbledhur për të filluar projektin e rikonstruksionit të Vlorës historike për të rikthyer memorien historike, e cila u la në harresë. Sot, ajo rifillon t’i rikthehet qytetarëve.
Këtu ka një potencial të jashtëzakonshëm për një impuls të rëndësishëm në funksion të ruajtjes së vlerave të mbetura, por edhe në funksion të rritjes së ekonomisë e turizmit.
Kemi zhvilluar disa diskutime për rëndësinë e kësaj zone dhe pastaj kemi dakordësuar dhe kështu fondi ka financuar projektin dhe do të financojë edhe një pjesë të zbatimit të projektit. Ka të bëjë me gjithë rindërtimin e rrjetit elektrik dhe të ujësjellësit, fondi do të financojë 4 mln euro, ndërsa qeveria rreth 7 milion euro dhe do i japim vendit një tjetër zhvillim të rëndësishëm.
Përpjekja për të ruajtur gjithçka që ka mbetur nga e shkuara
Para bashkisë do të krijohet një shesh i rëndësishëm dhe do t’i japë një frymëmarrje të re të gjithë asaj zone.
