Kryeministri Edi Rama ka mbledhur grupin parlamentar të PS-së, ku e ka nisur fjalën e tij duke i dhënë një mesazh demokratëve.
Kryeministri tha se deputetët e PD-së gabojnë nëse nuk e votojnë Ruçin si kryetar të Kuvendit, ndërsa shtoi se sidoqoftë, nesër Ruçi do të votohet me shumicë votash.
FJALA E RAMËS:
Grupi i ri parlamentar i ka të gjithë që duhen për t’ia dalë me sukses. Jam shpresë plotë se pjesa me përvojë e grupit do të jetë një mbështetje e sigurt për ata që kanë ardhur rishtaz dhe që nesër shkelin për herë të parë në Kuvend. Në atë sallë do nisë një jetë e re parlamentare me zgjedhjen e Gramozit kryetar i Parlamentit.
Në emrin e të gjithëve ju dhe atyre që na votuan, më lejoni t’u them konkurrentëve tanë demokratë se nëse nuk e votojnë nesër Ruçin gabojnë sepse refuzojnë deputetin me historinë me të gjatë parlamentare, por duke e shënjestruar me topat e politikës së baltës gabojnë 100 herë sepse shqiptarët duan shtetin dhe mirëqenien.
Nesër ne do ta konfirmojmë me votën e shumicës së 25 qershorit kandidaturën e Ruçit.
Fillim javën e ardhme paraqesim qeverinë e re dhe më pas zgjedhim kryetaret e komisioneve parlamentare.
Puna fillon nesër me seancën e parë, por do vijojë intensivisht jo vetëm në kuvend por edhe në terren./ Tirana Today
