Nënkryetari i PD-së, Edi Paloka, i është bashkuar reagimeve për 2 korrikun ‘90, datën në të cilën 28 vite më parë, qytetarë të Tiranës hynë në Ambasadën Gjermane duke paralajmëruar fundin e regjimit diktatorial. Paloka thekson se Rama po përdor të njëjtën strategji si Ramiz Alia, në ato vite. Mes ironisë, demokrati thekson se Ramën e gënjen mendja se do të ketë tjetër fund nga ai i Ramiz Alisë.
Më postimin e radhës në Facebook, Paloka ka krahasuar ato vite, me sot. Ai kujton një urdhër të dhënë nga Ramiz Alia, që policia të mos pengonte më njerëzit që kërkonin të hynin nëpër ambasada. Kjo pasi Shqipëria kishte mbetur vendi i fundit komunist në Evropë, pas rrëzimit të Murit të Berlinit.
‘Shpërthimi i ambasadave ishte një nivel tjetër i revoltës së shqiptarëve, por atë moment Alia u perpoq ta përdorte në favor të tij’, shkruan më tej Paloka. Duke bërë këtë krahasim, Paloka nënvizon se kjo stategji e pastër po ndiqet edhe nga vetë kryeministri Edi Rama.
