Gjatë protestës së sotme të opozitës para Kryeministrisë, në bulevardin “Dëshmorët e Kombit” masa të forta sigurie u aktivizuan nga ana e Policisë së Shtetit.
Ashtu siç pritej, për ruajtjen e rendit dhe sigurisë u angazhuan mbi 2 mijë policë nga komisariatet e Tiranës, njësia “Shqiponja”, Forcat Operacionale dhe ato të Ndërhyrjes së Shpejtë.
Duke qenë se përbën një rëndësi të veçantë, godina e Këshillit të Ministrave ishte objekti më i blinduar gjatë protestës. Grilat e dritareve të Kryeministrisë pothuasje gjatë gjithë protestës qëndruan të mbyllura ndërsa para saj u vendos një gardh teli, prapa të cilit qëndronte kordoni policor.
Pavarësisht se u deklarua se vijën e parë të kordonit policor do të ishin policet femra, kësaj here një numër i madh policësh ishin meshkuj.
Gjatë protestës ajo që nuk u vu re ishte fakti se në godinat më të larta pranë bulevardit ku u zhvillua protesta kishte efektivë të Policisë dhe Gardës së Republikës, të pajisura jo vetëm me dylbi por edhe me snajperë, që monitoronin nga lart zhvillimin e tubimit.
Forcat e sigurisë kishin zënë pikat kyçe në tarracat e Kryeministrisë, Kryesisë së Kuvendit dhe në lartësinë e dy kullave binjake. Mbi godinën e Kryeministrisë kanë qenë 6 efektivë të Gardës dhe Policisë të pajisur me dylbi dhe snajperë. Në godinën e Kryesisë së Kuvendit kanë qenë 2 punonjës të Gardës, ndërsa mbi kullat binjake, kanë qenë respektivisht tre snajperë në njërën godinë dhe një në tjetrën.
