Kryeministri Edi Rama, bashkë me Ministren e Turizmit, Mirela Kumbaro si dhe kryetaren e Bashkisë së Durrësit Emirjana Sako, po zhvillojnë një takim për bilancin e sezonit turistik. Kreu i qeverisë është fokusuar dhe tek ata shqiptarë që zgjedhin të marrin rrugët e emigracionit klandestin në Angli. Kryeministri Rama ka thënë se nëse ata ndërtojnë një agroturizëm në Kukës, do të fitojnë shumë më shumë se në çfarëdolloj pune që të bëjnë në Angli. Ai premtoi gjithashtu se të gjithë ata që duan të investojnë në agroturizëm, do të kenë mbështetjen e qeverisë.
“Është kollaj të qeshësh, të manipulosh dhe të helmosh. Unë e përsëris që gjithë ata që paguajnë nga 30 mijë paund për të marrë rrugët e frikshme të emigracionit klandestin, duke ia lënë të gjithë kursimet në dorë trafikantëve në kërkim të një parajse që nuk kanë për ta gjetur në Angli, me ato 30 mijë paund mund të bëjnë ekonominë e tyre atje në Kukës.
Këtë e them bazuar në çfarë kam parë në realitetin e shumë agroturizmave që janë ndërtuar. Le të shkojnë e t’i pyesin. Ne jemi gati t’i mbështesim të gjithë ato të rinj në Kukës, që duan të bëjnë agroturizëm në Kukës. Fitojnë nga ai agroturizëm shumë më shumë nga se ç’do të fitonin nga çdo punë në Angli. Ky është fakt dhe nga ana tjetër është fakt që agroturizimi po jep rezultat për ata që e kanë marrë përsipër, është një e ardhur e sigurtë dhe do të jetë një e ardhur gjithnjë e rritur në Shipëri e cila do të bëhet kampione e Ballkanit në turizëm. Jemi mjaftueshmërisht afër po të kemi parasysh progresin”.
