Rama: Kush s’kthehet në punë nesër, nuk do gjejë më vend në Albcontrol

Kryeministri Edi Rama u ka bërë apel kontrollorëve të aeroportit të Rinasit që të ndahen nga ata që i futën në këtë lojë të çmendur.

Ai u shpreh se kush nuk kthehet në punë nesër, nuk do gjejë më vend në Albcontrol.

”Apel për kontrollorët e Rinasit: Ndahuni nga ata që ju futën në këtë lojë të çmendur me zjarrin! Braktisini në rrugën e tyre qorre organizatorët e kallzuar penalisht! Kush nuk kthehet në punë nesër, nuk do gjejë më vend në Albcontrol. Koha e Rrumpallës ka vdekur dhe nuk kthehet!’’, shkruan Rama në rrjetin social, Twitter.

Shqipëria i ka të mbyllura të gjitha fluturimet hyrëse dhe dalëse nga Rinasi për një afat të pacaktuar.

Kjo për shkak se 65 kontrollorët e Albcontrol, një kompani me kapital 100% shtetërore, refuzuan të dilnin në punë pasi firmosën edhe deklaratën e paaftësisë në punë.

Ata kërkojnë që paga e tyre të vazhdojë si përpara pandemisë në mbi 4 mijë dollarë dhe për këtë kërkojnë ndërhyrjen e ministrisë së Energjisë dhe Infrastrukturës, Belinda Balluku.