Kryeministri Rama bëri bujë dje në media pasi ofendoi të gjithë gazetarët dje pas seancës plenare, duke i cilësuar si të paditur, injorantë dhe që merren me thashetheme.
Këto deklarata të forta shkaktuan reagime të shumta, por kryeministri nuk e ka lënë me kaq.
Edhe sot, në një takim me investitorët e huaj, Rama i ka ofenduar sërish gazetarët. Këtë herë, duke iu drejtuar investitorëve të huaj me një këshillë të çuditshme, të cilëve u tha që të mos takonin gazetarë dhe as të mos lexonin gazeta, sepse sipas kryeministrit “pengojnë aparatin tretës”:
“Me sugjerimin që kush ka ardhur sot t’i gëzohet këtij vendi të bekuar dhe kaq të bukur dhe me këshillën miqësore që as të mos takoni gazetarë dhe as të mos lexoni gazeta, sepse ju pengojnë gjithë aparatin tretës, ju uroj mirëseardhjen dhe ju siguroj se kush investon sot në Shqipëri nuk do të pendohet kurrë nesër. Ky është momenti për t’i dhënë vetes shtysën për të investuar në Shqipëria.”
Teksa foli për ekonominë e vendit, Rama qau hallin se si e mori atë të rrënuar nga qeveria paraardhëse, dhe më pas shfaqi “arritjet” e qeverisë Rama.
FJALA E RAMËS:
Kemi qenë të imponuar nga kushtet për të bërë reforma shumë të vështira dhe që patjetër sollën rritje të posaçme. Sot mund të themi me plot gojën që mund të ndërtojmë një ekonomi bazuar tek investimet prodhuese që krijojnë punësim real.
Ka ende shumë për të bërë në raport me qasjen dhe sjelljen e administratës në tërësi, kemi bërë një hap të rëndësishëm përpara.
Në një tufë dokumentesh që u eliminuan në fillim, iu kursyen sipërmarrjes 56 vjet. Është një shifër katastrofike dhe do vazhdojmë për të pasur numrin më të ulët të dokumenteve në rajon. Sot jemi në kushtet kur pavarësisht se çfarë thuhet nëpër frëngjitë e medias, Shqipëria është një vend i sigurt për biznes, duke filluar nga turizmi.
Po përgatisim një projekt që për çdo investim 10 vjeçar, të jetë pa taksa sepse kjo është rruga për të pasur një impakt të shpejtë e pozitiv në këtë sektor dhe për të pasur një rritje punësimi.
Shqipëria është një vend ku nuk mungojnë problemet. Nëse do të dëgjoni sidomos ambasadorët e huaj, të cilët me shumë të drejtë janë shumë kërkues, që e shikojnë Shqipërinë si vendin që duhet të anëtarësohet ne BE, ama nëse do të dëgjoni sipërmarrësit që operojnë në Shqipëri, me siguri do të keni një pamje shumë më inkurajuese dhe optimiste se ajo që mund të ofrohet nga perceptimi i përgjithshëm apo nga thashethemet e medieve.
