Kryeministri Edi Rama është treguar mjaft pozitiv sot në mbledhjen me grupin parlamentar, ku dha lajmin se sipas tij jemi një hap afër çeljes së negociatave me Bashkimin Evropian, teksa tha se Shqipëria i ka kryer detyrat e shtëpisë me përpikëri.
Gjatë fjalës së tij në nisje të mbledhjes, kryeministri Rama i bëri thirrje opozitës për dialog për çështjen e negociatave me BE-në dhe jo vetëm.
Po ashtu, Rama e konsideroi moment mjaft pozitiv partneritetin me Greqinë, ndërsa paralajmëroi për një marrëveshje të mundshme me shtetin fqinj.
Fjala e Ramës:
Me hapjen e një faqeje të re për negociatat me Greqinë. Në të gjitha takimet, ishte e qartë për ne që Shqipëria është një hap afër çeljes së negociatave me BE-në. Reforma në Drejtësi, fillimi i punës për Vettingun dhe qartësia se ky është një proces që nuk ka shans të bllokohet, janë një bazë solide për marrjen e një rekomandimi të pastër nga KE dhe miratimi nga Këshilli Evropian për çeljen e negociatave për anëtarësim.
Qartësia e krijuar lidhur me pamundësinë e bllokimit politik të Reformës në Drejtësi dhe Vettingut, e konsoliduar me zgjedhjen e Prokurores së Përgjithshme, përbëjnë një arsye shumë të fortë për BE-në për ta parë me optimizëm nga ana jonë fillimin e procesit të negociatave.
Jo vetëm ky aspekt, por edhe të tjera që lidhen me 5 prioritetet kyçe, na vendosin në një favor, konsiderohet se Shqipëria i ka kryer me përpikëri detyrat e shtëpisë. Nuk ka një pikë ndalimi, procesi vazhdon ditë për ditë.
Rezultati spektakolar në luftën kundër kanabisit dhe të gjithë hapat që do vazhdojnë të hidhen me përpikëri, përbëjnë një arsye të fortë për të ndarë me opinionin publik se fantazitë e ushqyera nga frika dhe propaganda për kapjen e drejtësisë janë dokrra.
Dua ta nënvizoj domosdoshmërinë, opozita ka të drejtën e vet të ketë nga agjendë që nuk përputhet me fokusin që klasa politike duhet të ketë, ne kemi detyrimin që të përpiqemi për të krijuar kushte për dialog me opozitën. Shpresoj dhe uroj që temën e reformës zgjedhore të ketë dialog, proces dhe sens urgjence për të mos i lënë çështjet për momentin e fundit.
Jemi të hapur që edhe në tema tjera, asnjëherë të mos jetë shumica jonë problemi.
Dua të vë në dukje se jemi në një moment jashtëzakonisht pozitiv në dialogun me Greqinë, sikur e përmendi kryeministri grek, pajtohem me përshtypjet se nënshkrimi i një dokumenti të ri partneriteti me Greqinë, është shumë afër. Duhet të presim përfundimin e shkruar për një sërë temash, duke filluar nga ligji i luftës, por edhe duke vazhdar me tema të një rëndësie të veçantë, si marrëveshja për kufirin detar, apo garantimi për të pasur lëvizje të lirë dhe akses të plotë ligjor për të drejtat e pronësisë. Po konkludojmë edhe një aspekt tjetër të procesit, që ka të bëjë me lehtësimin e marrëdhënieve që kushtëzojnë komunitetin e madh të shqiptarëve që kanë emigruar në Greqi, në aspektin e burokracive, lëvizjeve etj. TIRANA TODAY
