Kryeministri Edi Rama gjatë fushatës elektorale në Përmet kërkoi besim për kandidaten socialiste në këtë Bashki, për të çuar përpara punët e qytetit të luleve. Duke vijuar me ironi, shefi i qeverisë tha se këtë herë në filxhanin e saj, kryetarja e LSI-së Monika Kryemadhi ka parë një numër 21 dhe do t’i thotë Presidentit ta vendosë datën e re të zgjedhjeve më 21 Tetor, se i del edhe një T. Nëse kjo ndodh, sipas kryeministrit do të ishte e rrezikshme.
“Del fallxhorja dhe thotë, Liri caktoje këtë datën këtu se shoh një dysh, caktoje në 21. Shoh edhe një T, ti caktoje në tetor. Do dilte Liri dhe do thoshte bazuar në informacionet e agjencive ligj zbatuese ndërkombëtare unë vendosa të vë këtë datë 21 Tetor si datë zgjedhjesh vendore. Po kjo do ishte e rrezikshme.
E keqja që do vinte nga kjo ishte vendosja e një rregulli të ri, që kur s’do një palë, pala tjetër s’do mund të bënte më asgjë. Pra, nuk do vendosej dot më kurrë se kur do bëhen zgjedhjet. Ky nuk është film i ri, e kemi parë 30 vjet këtë film me Saliun, që u mësua t’ja marrë gjërat me forcë socialistëve”,- tha Rama.
Por, pak më herët Rama është përballur me një grup protestuesish në Përmet, të cilët tentuan t’i bllokonin rrugën. Lidhur me protestat, Rama ka ironizuar opozitën, duke thënë se është këtyre në çeta me 50 persona që shfaqen rrugëve.
“Këtu në Përmet kemi pasur vullnetin për të mbështetur çdo projekt të kryetarit të bashkisë dhe është në rastet e pakta që kemi gjetur gjuhën e bashkëpunimit dhe ia kemi dalë që vizionin tonë ta jetësojmë të pa bllokuar. Por me Almën do të bëjmë shumë më tepër. Për fatin e keq të demokratëve, që nuk duan të arsyetojnë, pse dhe si PS-ja është forca e duhur dhe duan të kenë partinë e tyre në qeveri. Ata që sot duhet të ishin para jush, kanë ikur nga gara dhe kanë ndërmarrë ofensivën më të turpshme kundër zgjedhjeve, jush dhe popullit. Janë kthyer në çeta me 50 veta që shfaqen cepave të rrugëve. Flas për demokratët që jetojnë me punën e tyre dhe jo me përsheshin e SHQUP-it” ,-tha Rama.
