Kryeministri Edi Rama ka drekuar sot në një familje të minoritetit grek, në Dropull.
Gjatë bisedës me kryefamiljarin, anëtarët e tjerë të familjes kanë ngacmuar këtë të fundit, teksa i kanë thënë kryeministrit se të zotit të shtëpisë nuk i pëlqen veshja e tij.
Kryefamiljari e mohon këtë, ndërsa thotë se sportiv duket shumë mirë dhe se njeriu duhet ta pranojë tjetrin ashtu siç është.
Gjatë kësaj bisede, kryeministri Rama ka rrëfyer një moment nga mbledhja e famshme në Bruksel, ku bëri bujë fakti se ai ishte veshur sportiv, ndryshe nga të gjithë homologët.
Këta të fundit, sipas Ramës e kanë vlerësuar atë, madje i kanë thënë se duhet të kishin vepruar njësoj.
“U komentova shumë për veshjen në Bruksel. Mirëpo mua më thanë kemi një darkë informale. Dhe unë shkova sportiv. Ata aty thoshin shyqyr, pse s’e bëmë edhe ne këtë punë? U thashë, ‘ça të them unë i shkreti?’”, tha Rama./ Tirana Today
