Tragjedia e Xhenovas ku gjetën vdekjen 39 persona si pasojë e shembjes së urës, ka ngritur shqetësimin në opinionin publik shqiptar mbi sigurinë e ndërtesave të shumta, kryesisht tek urat në segmente të ndryshme rrugore.
Tragjedia e Xhenovas ku ura e dhënë me koncesion në mirëmbajtjen e saj nxori në pah papërgjegjshmërinë e sipërmarrësve privatë ndaj jetës së njerëzve, përbën të njëjtin shqetësim edhe në Shqipëri, ku modeli i PPP-ve ka zaptuar politikat zhvillimore të qeverisë Rama.
Duke pasur parasysh këtë lloj papërgjegjshmërie, qeveria shqiptare përmes punonjësve të policisë do të inspektojë zonat problematike rrugore, ku kryesisht urat dhe segmentet delikate rrugore mund të rezultojnë fatale për jetën e njerëzve.
Në një analizë të zhvilluar nga Policia Rrugore, kreu i saj Mithat Tola theksoi se policia ka filluar inspektimin e segmenteve të ndryshme rrugore që mund të rezultojnë fatale për jetët e njerëzve. 
“Javën në mbyllje dhe javët në vijim, shërbimi i Policisë Rrugore në bashkëpunim me “Autoritetin Rrugor Shqiptar”, nisur nga ngjarja tragjike – rrëzimi i Urës në Genova të Italisë, ku humbën jetën 39 persona, ka filluar inspektimin e sistemeve të sinjalizimit vertikal dhe horizontal mbi tregimin e peshës së lejuar të mjeteve mbi ura si dhe në përbërje të grupeve teknike të inspektimit edhe për të verifikuar gjendjen e këtyre strukturave dhe të elementeve të sigurisë. Në bashkëpunim me aktorë të tjerë të ngarkuar me ligj për menaxhimin e elementëve të sigurisë rrugore në këto infrastruktura, Shërbimi i Policisë Rrugore do të monitorojë në mënyrë të rreptë tejkalimet e peshave të ngarkesave të mjeteve, për të shmangur dëmtimet dhe respektimin e ligjit duke “prodhuar” me shumë siguri rrugore”, u shpreh Tola gjatë analizës së Policisë Rrugore mbi ecurinë e trafikut në vend dhe mbikëqyrjes së segmenteve delikate rrugore që mund të jenë fatale për jetët e njerëzve. Ashtu siç papërgjegjshmëria e koncesionarit në Itali shkaktoi vdekjen e 39 personave.
