Pas akuzave të kreut Lulzim Basha, ka reaguar kryeministri Rama. Kreu i qeverisë iu përgjigj me një postim në rrjetet sociale.
“Shpif shpif se lirohesh, i thonë një llafi, po s’ka më peshk se rob jo e jo, që s’e ka marrë vesh se sulmet vulgare ndaj prokurorisë vijnë nga dhimbjet e forta të kokës për çështjet e hapura me drejtësinë! Lufta me krimin e me korrupsionin vetëm do të përshkallëzohet”, shkroi Rama.
Kryetari i PD-së Lulzim Basha reagoi pas arrestimeve të ish-deputetëve socialistë Arben Ndoka dhe Arben Çuko.
“Peshku i madh i kësaj çështjeje quhet Vangjush Dako, të tjerët janë peshq të vegjël të cilët po serviren si pjesë e përpjekjes së Edi Ramës, Fatmir Xhafës dhe Donika Prelës për të shpëtuar peshkun e madh të kësaj dosjeje dhe për të shkatërruar provat që duhet të çojnë në arrestimin e Dakos.
Peshqit e vegjël që kanë arrestuar mbrëmë do të lirohen, akuzat do t’u lehtësohen, është e gjitha pjesë e një përpjekjeje të prokurorisë të kapur nga krimi, Edi Rama dhe Fatmir Xhafaj. Duke i sërvirur opinionit publik dhe opinionit ndërkombëtar disa peshq të vegjël, të cilëve gjithsesi do t’u lehtësohen akuzat dhe do të lirohen, siç ka ndodhur deri më sot, të mbyllet hetimi për Dakon dhe të paktën 4 deputetë të tjerë socialistë si pjesë e kësaj dosjeje hetimore”.
