Universiteti Bujqësor i Tiranës ka nënshkruar një marrëveshje me universitetin e Michiganit. Në fjalën e tij, kryeministri Edi Rama theksoi se do të përshpejtohet modernizimi i këtij universiteti, duke pretenduar se është një nga universitetet e të ardhmes. Me ironi ai ia ktheu kritikëve se ky universitet merret me fshatin dhe fshatarët.
Gjatë një ceremonie ku u nënshkrua një memorandum mirëkuptimi mes Universitetit Bujqësor të Tiranës dhe Michigan State University, Rama është shprehur se synimi është që deri në vitin 2030, ky universitet të jetë njësoj si ai i Vjenës.
“Unë besoj, mund të jem pakicë, por do bëhen shumicë, se ky universitet është një nga universitetet e të ardhmes. Nuk është çështja siç ka qenë Universiteti Bujqësor merret me bujqësi merret me fshat dhe fshatarë, këtu çështja është tjetër dhe do të jetë në fokusin e njerëzimit, shoqërive, vendeve dhe elitave akademike.
Kjo që ndodh sot është një moment shumë domethënës në këtë drejtim. Është një luftë që ndër të tjera na tregon sesa nevojë do të ketë bota jo thjesht ne, por bota për dijen dhe për zhvillimin e qëndrueshëm në funksion të garantimit të të jetuarit normalisht.
Të gjitha burimet natyrorë janë të kërcënuara nga rritja eksponenciale e popullsisë në përgjithësi. Arsye pse jemi mbledhur këtu është themelore që ne ti japim këtij universiteti për të përshpejtuar adoptimin dhe modernizimin, duke shfrytëzuar burimet njerëzore të universitetit. Këtu ka një kapacitet burimesh për shkak të traditës dhe eksperiencës.
Ne duam që brenda këtij 10 vjeçari, deri në 2030 ky këtu të jetë Universiteti simotra apo sivëllau i Universitetit të Vjenës. Kjo është plotësisht e mundur. Ne do vazhdojmë punë me rektorin, i cili ka një energji të admirueshme. E shikoni që edhe kur mban fjalime bën çmos që të thotë sa më shumë në njësinë e kohës. Është kënaqësi për mua, sepse unë i kam tmerr njerëzit që flenë gjumë dhe nuk dinë të punojnë. Është kënaqësi kur rektori me ngacmon dhe më thotë që duhet kjo apo ajo”, tha Rama.
