Kryeministri Edi Rama ka mbajtur një fjalim jo të shkurtër, ku ka komentuar refuzimin e presidentit Meta për dekretimin e Sandër Lleshit si ministër i Brendshëm.
Gjatë fjalës së tij, Rama nënkuptoi se ky mosdekretim bë duke punuar kundër Reformës në Drejtësi. Por, sipas kryeministrit, qeveria nuk do të ndalet, por do t’i shkojë në fund emërimit të Lleshit si ministër i Brendshëm.
Duke iu referuar arsyes që Meta dha edhe në letër, por edhe në takimin me Ramën, kryeministri e ka konsideruar si qesharake, madje është tallur teksa shtoi se nuk u besoi veshëve kur e dëgjoi.
Kryeministri Rama tha:
Po punohet për pengimin e Reformës në Drejtësi. Kemi vendosmërinë për të arritur qëllimin, për mbrojtjen e Kushtetutës. Kjo është e kapërcyeshme. Nëse edhe presidentit nuk do i mungojë dëshirë për bashkëpunim, kjo krisje do zhduket në pak kohë. Ne do i bëjmë hyzmetin kësaj çështjeje dhe do vazhdojmë të komunikojmë me presidentin.
Mendova se kam problem me veshët, kur ma tha në atë takim, thashë mos o Zot. Meta të na rrëfejë, me dyer të mbyllura, të hapura, ose këtu në parlament gjithçka që e ka mbajtur për brenda. Mos qoftë ajo që më ka thënë mua se çdo gjë mund ta përballoj, por një president qesharak nuk e përballoj dot. Do t’i japim ca ditë kohë presidentit që ta bluajë këtë çështje dhe të punojë që të krijojë bindje të plotë./ TIRANA TODAY
