Pas mbledhjes së grupit parlamentar të PS-së, ku u zgjodhën drejtuesit e këtij grupi, kryeministri Rama ka mbajtur një fjalim.
Ai e nisi fjalën e tij me një falendërim për Gramoz Ruçin, për të cilin tha se i ktheu dinjitetin sallës së Kuvendit, duke iu referuar ndërprerjes së fjalës së Berishës në foltore.
Më tej, kryeministri kërkoi respektimin e orarit të nisjes së seancës çdo të enjte, teksa theksoi se qeveria do “i mbajë dorën shtrirë opozitës” pavarësisht reagimit të saj.
Gjithashtu, Rama tha se qeveria do të mblidhet në çdo qark pas çdo viti politik, ndërsa iu drejtua ministrave se duhet të qëndrojnë 1 herë në një muaj në një qark për të qenë më afër qytetarëve.
Në fund, kryeministri nuk harroi as Saimir Tahirin, dikur të besuarin e tij, për të cilin tha se është caktuar koordinator për bashkëqeverisjen në terren.
FJALA E RAMËS:
Dua të falendëroj Gramozin që realisht i ktheu dinjitetin asaj salle dhe na ktheu shpresën se në atë sallë mund të ketë rend dhe rregull dhe se në atë sallë mund të flitet për njerëzit dhe jo për njëri-tjetrin.
Dua të përmend një detaj, që fillimi për herë të parë në historinë e kuvendit të seancave në orën fiks të përcaktuar është një normë që do ta respektojmë për 4 vjet.
Nëse përfaqësuesit e popullit nuk janë në gjendje të respektojnë orarin e ditës më të rëndësishme të javës, atëherë vajmedet për tjerat.
Duke ju falënderuar edhe për këtë kontribut, dua të nënvizoj se pavarësisht reagimit të PD-së ndaj qasjes tonë, qasja jonë nuk ndryshon. Nuk do të shkojmë në atë sallë për të vazhduar avazin e vjetër, por për të debatuar lidhur me programet tona dhe për ta mbajtur dorën të shtrirë ndaj opozitës pavarësisht reagimit të tyre.
Seancën tjetër do nënshkruajmë marrëveshjen mes anëtarëve të kabinetit qeveritar, e cila do u shpërndahet deputetëve, marrëveshje që sanksionon rregullat e veprimit mes grupit parlamentar.
Qeveria gjatë një sesioni parlamentar do të mblidhet nga një herë në çdo qark, jo për të bërë një mbledhje simbol, por për t’u postuar në çdo qark një herë në vit dhe për të qëndruar aty dhe për të kaluar atje kohë e për të punuar, për të thirrur ë dëgjesa drejtuesit e institucioneve, për t’u ulur me drejtues vendorë dhe për t’u takuar me banorët.
Çdo ministër, gjatë një viti parlamentar duhet të qëndrojë një muaj në një qark.
Do fillojmë punën në terren, duke caktuar një koordinator për bashkëqeverisjen: Saimir Tahiri. Platforma nuk do jetë një portal, por një bashkëmekanizëm njerëzish. Njerëzit duan pastrim nga grabitqarët dhe parazitët, duan shërbim, duan ndëshkim të atyre që bëhen pengesë për të drejtat e tyre. Këto tre gjëra mund t’i realizojmë vetëm nëpërmjet bashkëqeverisjes me ta./ Tirana Today
