Analisti Fatos Lubonja është i mendimit se duhet të gjenden menjëherë instrumentat, për të goditur këtë sistem, në formë të tillë që ata që janë në qeveri të mos kenë më të bëjnë me oligarkët.
Mjaft i drejtëpërdrejtë në qëndrimin e tij, analisti e konsideron kryeministrin Rama si një kukull në duart e oligarkëve. I ftuar në rubrikën “Opinion” në “News 24”, Lubonja tha se Rama nuk mund të ketë pushtet pa oligarkët që ekzistojnë në Shqipëri, dhe për këtë arsye duhet goditur sistemi.
“Fillimisht më duket pozitive, se nuk është Edi Rama ai që mund të vendosë për çdo gjë, por ai e bën këtë falë një mbështetjeje të fortë që vjen nga paratë. Sistemi e ka bërë të rrezikshëm personin.
Për çlirimin nga e keqja duhet goditur sistemi. Është e rëndësishme që njerëzit e dinë të keqen. Është një gjë që nesër ja kërkon edhe pse zhgënjehesh. Më përpara përdoreshin vetëm emrat Nano, Berisha, Rama, Meta, po emrat e oligarkëve nuk dilnin.
Këto janë kukulla, s’mund të ketë pushtet pa oligarkët. Shqipëria vend i vogël, dhe e keqja nuk fshihet dot. S’bëhet fjalë vetëm për personin e keq, por për sistemin e keq që ka marrë personin përsipër, si kukull. Por duhen gjetur instrumentet që si do shkatërrohet ky sistem. Ky është hap tjetër që opozita duhet ta dijë qartazi”, tha Lubonja.
