PD dhe LSI depozituan mesditën e sotme në Prokurori, një padi kundër kryeministrit Rama. Padia në fjalë lidhet me denoncimin e ish-oficerit të Fushë-Krujës, tashmë në arrati, Emiljano Nuhu, se është kërcënuar me jetë në zyrën e tij nga të afërm të deputetit socialist, Rrahman Rraja, dhe në prani të kryetarit të grupit parlamentar, Taulant Balla.
Opozita i mëshon faktit se reagimi i kryeministrit Rama ka qenë në mbrojtje të deputetit Rraja, duke promovuar dhunën dhe krimin. Më konkretisht, opozita ka tre akuza ndaj Ramës, “kanosja për shkak të detyrës”, “veprime që pengojnë zbulimin e së vërtetës” dhe “kanosja për të moskallëzuar”.
Sipas PD dhe LSI, nga deklarimi publik i kryeministrit Rama më datë 29.09.2018, arrihet në konkluzionin se:
- a) Kryeministri Edi Rama, nëpërmjet deklarimit të tij publik, ka patur për qëllim jo vetëm manipulimin e opinionit publik mbi çështjen, por mbi të gjitha intimidimin dhe paracaktimin e rezultatit të hetimit nga organet ligjzbatuese, me synimin për të penguar zbulimin e të vërtetës.
- b) Kryeministri Edi Rama, nëpërmjet deklarimit të tij publik, ka patur për qëllim kanosjen mafioze ndaj Nënkomisarit Emiljano Nuhu, me synimin për ta friksuar që të mos flas më tej.
- c) Kryeministri Edi Rama, nëpërmjet deklarimit të tij publik, ka patur për qëllim kanosjen mafioze ndaj çdo punonjësi të Policisë së Shtetit që ka dijeni mbi rrethanat e ngjarjes, me synimin që ato të mos dëshmojnë dhe të mos tregojnë të vërtetën, por të heshtin.Sikurse, nga hetimi i SHÇBA dhe këqyrja e pamjeve filmike në ambientet e komisariatit të Fushë Krujës, as Nuhu por as edhe personat e akuzuar prej tij nuk rezultojnë të kenë qenë në stacionin e policisë së Fushë Krujës në datën 21 korrik, siç pretendon oficeri se është kanosur me armë në kokë nga Xhelal Rraja, vëllai i deputetit Rrahman Rraja, për të lënë të lirë djalin e tij, Rexhep Rraja i kallëzuar për ushtrim dhune nga ish e dashura, Xhisiela Maloku.
Edmond Spaho deklaroi për mediat se Rama ka konsumuar tre vepra penale. “Kanosjet i kishin ardhur nga Rrahman Rraja, i biri dhe familjarë të tyre. Edhe në fillimin e procesit penal, kreu i grupit të PS, kreu i bashkisë së Krujës dhe deputet Rraja kanë qenë në Komisariat dhe e kishin kërcënuar nënkomisarin. Çuditërisht pas fillimit të hetimeve nga Prokuroria, si për ngjarjen në Krujë, dhe për kërcënimet ndaj Nuhut, pra dy hetime të filluara nga Prokuroria, Rama në një komunikim publik kërcënon nënkomisarin Nuhu, duke e quajtur horr të kthyer në hero, që ka penguar hetimin dhe e ka përdorur rastin për të marrë azil politik.
Rama i është kanosur komisarit, ka ndërhyrë në punën e organeve hetimore dhe paracaktoi rezultatin e hetimit dhe vendosi se si duhet të ishte, të mbrohej djali i deputetit dhe të poshtërohej dhe dënohej nënkomisari Nuhu”, tha Spaho.
“Rama ka kryer tre vepra penale referuar kodit, “kanosje për shkak të detyrës”, “veprime për fshehjen e së vërtetës”, dhe së treti “kanosje për të mos kallëzuar” ndaj komisarit Nuhu, që dënohen me 2,3 dhe 4 vjet burg”, vijoi Spaho.
Një kundërpërgjigje në kohë reale ka ardhur nga kryemnistri Rama, i cili nuk lë pas ironinë.
“Dy gjysmagjela të opozitës së shpërndarë më paskan kallëzuar në Prokurori në emër të heroit të filmit Babale 2. I falenderoj dhe plotësisht gati të hetohem, duke pritur me durim që Prokuroria t’i nxjerrë fundin të dy Babaleve, ndërkohë që puna për Paketën Antishpifje vazhdon”, shkruan ai në Twitter.
