Kryeministri Edi Rama, gjatë mbledhjes së përbashkët të dy qeverive, asaj shqiptare dhe kosovare, ka bërë thirrje që të qëndrojmë të bashkuar.
Në nisje të fjalës së tij, Rama foli për një letër që At Shtjefën Gjeçovi i kishte dërguar Konicës para 120 vitesh, ku thoshte ndër të tjera se “zemra e shqiptarit duhet të lakmojë bashkim ndër vedi”.
E sipas kryeministrit të Shqipërisë, urdhëresat e Lidhjes Shqiptare janë tashmë në rendin e ditës të dy qeverive.
“Dje përkujtuam në Prizren për të dytën herë brenda këtij viti amanetet dhe urdhëresat e Lidhjes Shqiptare të cilat koha jo vetëm që nuk u ka zbehur, por i ka në rendin e ditës. Sot dua të sjell këtu pasazhet e një letre që shqiptari i madh prej Kosove, At Shtjefën Gjeçovi i dërgonte prej Pejës Faik Konicës, 120 vjet më parë në 1898. Zemra e një shqiptari të vërtetë duhet të lakmonte bashkimin ndër vedi, gegë toskë jemi një mendje e një zemre, mos degatohemi, ndahemi ndër erë, në dashnim këtë Shqipni kaq të mirë dhe kaq të hijshme. Për Shqipërinë, Kosova është një shtet i pavarur, sovran, i barabartë me të ngjashmin e tij, në një regjim kushtetues demokratik dhe liberal, garancia dhe qenësia e normalizuar e të cilit është çelësi i stabilizimit përfundimtar dhe i ndërlidhjes rajonale në një pikëpamje afatgjatë”, tha ndër të tjera Rama.
Me heqjen e pikave doganore mes Shqipërisë dhe Kosovës, dy qeveritë parashikojnë kështu afrimin e shqiptarëve.
Kujtojmë se lidhur me vendosjen e taksës 100% për produktet serbe, Rama e mbështeti vendimin e qeverisë së Kosovës ndërsa u tregua kritik ndaj BE-së, së cilës iu referua duke thënë se edhe Shqipëria, edhe Kosova, e meritojnë liberalizimin e vizave./ TIRANA TODAY
