Kryeministri Edi Rama, gjatë mbledhjes me Task Forcën në Zyrën Operacionale të Situatës, paralajmëroi grupet kriminale të trafikut të drogës në vend, për të cilët tha se “duhet të gjejnë vend të futen”.
Kryeministri pranoi se ka ende persona brenda policisë të implikuar në narko-trafikun, ndërsa tha se “këta tradhtarë do e pësojnë shumë shpejt, si dhe do u hiqet “imuniteti” atyre që kanë krijuar të ardhura nga trafiku i drogës”.
Gjithashtu, kryeministri Rama kërkoi kalimin në skaner të të gjitha makinave luksoze, pronave të paluajtshme, llogarive bankare dhe bizneseve që nuk justifikojnë burimin e krijimit.
“Nëse nuk justifikojnë burimin e krijimit, të gjitha duhet të sekuestrohen dhe zotëruesit e tyre duhet të dalin para ligjit. Nuk është askush më i fortë se Policia e Shtetit. Forca më e madhe vjen vetëm nga tradhëtia brenda Policisë së Shtetit. Të fortët e kanë forcën në komisariat. Nuk e kanë forcën në ndonjë fuqi të papërballueshme. Ata dihet se kush jane dhe mbi te gjitha nuk jane as te fshehur. Askush nuk është më i fortë se Policia e Shtetit, ky mendim vjen nga tradhtarët brenda policisë, por këta tradhtarë do ta pësojnë dhe askush në polici nuk do të luajë me dy porta”, tha Rama ndër të tjera.
