Raporti i fundit i denoncimeve të portalit “Stop Korrupsioni” për periudhën shkurt 2015 – gusht 2017 tregon se për çështje të ndryshme në total janë bërë 17 770 denoncime. Ndërtimet pa leje janë shqetësimi më i madh i shqiptarëve në dy vitet e fundit.
Ky portal u themelua me synimin për të luftuar korrupsionin, por duket se problematikat kanë devijuar objektivin qendror. Shumica e denoncimeve ishin për ankesa që nuk lidhen me korrupsionin dhe në një pjesë të rasteve ka publikime në masë. Rreth 8 % e ankesave kanë të bëjnë me veprimet korruptive.
Pjesën më të madhe të denoncimeve e mbajnë ankesat për ndërtimet pa lejë dhe pas saj vjen Arsimi, Tatimet dhe Policia.
Për Arsimin kemi edhe rekordin e denoncimeve për korrupsion me 326 raste të raportuara dhe 1478 denoncime si ankesa.
Për Tatimet nga ana tjetër janë të paktën 1436 ankesa, kurse për korrupsion 87 prej tyre.
Edhe për Shëndetësinë që tradicionalisht është përfolur si një sektor me përhapje të gjerë të pagesave joformale numri i denoncimeve për korrupsion është i lartë në 259 ndërkohe që ankesa në tërësi janë 883.
Më pak mëkatarë duket se ka pasur në sektorin që lidhet me pronat, tenderët dhe Doganat që mbajnë edhe numrin më të ulët të denoncimeve në portalin e qeverisë, respektivisht 150 dhe 225 dhe 269.
