Kryeministri Rama akuzoi sot nga Përrenjasi, kryetaren e kësaj bashkie përfaqësuesen e LSI-së, Miranda Rira për keqpërdorim të fondeve dhe për nepotizëm të theksuar. Me një listë të parapregatitur emrash me funksionet përkatëse, kreu i qeverisë vuri përballë përgjegjësisë kryebashkiaken, të cilën tha që e kishte mbështetur me fonde të posaçme.
Në fjalën e tij para qytetarëve të Përrenjasit, Rama tha:
“E kam mbështetur kryetaren e bashkisë, jo vetëm si person, por për këtë komunitet fantastik njerëzish që nuk meriton të jetojë akoma si në një xhep fallso. I kam dhënë fondet që në fillim të vitit për të kthyer në normalitet pjesën hyrëse të qytetit, plus një fond për fushën sportive e bulevardin. Por ku janë? Unë nuk shoh asgjë këtu”-tha Rama.
Ndërsa akuzën për nepotizëm ekstrem Rama e argumentoi me listën e mëposhtme.
Inspektori i Financave, vajza e dajës së kryebashkiakes
Specialist i Financave, djali i dajës së kryetares
Specialist për problemet e dhunës në familje, vajza e motrës së kryetares
Inspektor për mbrojtjen e konsumatorit, kushërira e kryetares
Specialist shërbimesh, djali i dajës së kryetares
Hidraulik, kunati i drejtorit të shërbimeve
Shofer, djali i motrës
Roja i shkollës, djali i tezes
Kunata, punë në bashki
Djali i hallës, punë në bashki
Drejtori i rrugëve, krushku
Administratori i bashkisë, djali i tezes
Drejtori i Ujësjellësit, burri i gocës tezes
Drejtore e Përgjithshme e Drejtorisë së bashkisë, goca e tezes
Asistentja e kryetares së bashkisë, goca e xhajës
Specialist i elektronikës në bashki, çuni i hallës i kryetares
Specialiste e prokurimeve në bashki, goca e hallës
Inspektor i sportit dhe ngritjes së peshave, kushëri Mirëmbajtja e fushave të sportit, dhëndri i kushuririt të dytë, denoncoi Rama.
