Kryeministri Edi Rama ka reaguar në Twitter lidhur me deklaratat e kreut të opozitës, Lulzim Basha të bëra sot në një bashkëbisedim me gazetarët.
Duke iu referuar fjalës së kreut të PD-së, kryeministri ka ironizuar para pak minutash, duke e quajtur Bashën jo në formë të drejtpërdrejtë “një budalla që beson se po shkelet Kushtetuta”.
“A ka budalla që e beson se SHBA/BE duan prokuror të përkohshëm për të mbyllur dosje hetimore duke shkelur Kushtetutën?Hajde politikë hajde!”, shkruan kryeministri Rama për Bashën.
A ka budalla që e beson se SHBA/BE duan prokuror të përkohshëm për të mbyllur dosje hetimore duke shkelur Kushtetutën?Hajde politikë hajde!
— Edi Rama (@ediramaal) December 13, 2017
Por, cila është deklarata e bëra sot nga Basha për çështjen e kryeprokurorit të ri?
Kryedemokrati theksoi sërish sot se me anë të zgjedhjes së një kryeprokurori të përkohshëm, Rama shkel Kushtetutën dhe po tenton bllokimin e Reformës në Drejtësi.
Madje, deputeti demokrat thumboi edhe ambasadorin Lu, teksa ky i fundit mbështet zgjedhjen e një prokurori të përkohshëm të përgjithshëm dhe i ka kërkuar Bashës që të bashkëpunojë me Ramën dhe të lërë mënjanë mosmarrëveshjet politike.
“S’kam komentuar asnjëherë ambasadorët e huaj, por s’mund ta imagjinoj që dikush nga trupi diplomatik t’i kërkojë Kuvendit të shkelë kushtetutën apo të kërkojë mos bëhet vettingu i kryeprokurorit. Kjo do të ishte një thikë në shpinë të reformës në drejtësi për të cilën kanë kontribuar të gjithë përfaqësuesit e trupit ndërkombëtar”, u shpreh Basha për ambasadorin Lu. TIRANA TODAY
