Kryeministri Edi Rama në takimin e radhës elektoral ka folur mbi reformën në drejtësi dhe ka ngritur gishtin e akuzës ndaj sistemit gjyqësor. Në një takim me fermerët e Klosit, Rama vuri në dukje se ngjarja e 21 janarit 2011 do të hetohet pas zhvillimit të procesit të Vettingut.
“Po nuk u ndërtua sistemi gjyqësor, nuk bëhet drejtësi. Se më pyesin pse nuk është bërë drejtësi për 21 janarin, pse nuk është bërë drejtësi për shumë çështje të tjera. Nuk e bën drejtësinë kryeministri. Brenda 6 muajsh do të shikoni vetë gjykatat. Do të fillojë nga koka filtrimi i gjykatësve. Nuk do t’ia mbajë më njeriu të tallet me pronën dhe të drejtën tënde”, u shpreh kryeministri.
Sipas Ramës, reforma në drejtësi do të bëjë të mundur pastrimin e këtij sistemi që sipas tij ka tjetërsuar pronat dhe ka ulur zhvillimin ekonomik të vendit. Ndërsa theksoi se gjyqtarët e korruptuar do të përgjigjen para drejtësisë.
“Drejtësia e korruptuar është e lidhur me ekonominë, me zhvillimin ekonomik. Vjen një kompani gjermano-norvegjeze për të investuar në një resort turistik, në bregdetin shqiptar, por tokës shtetërore i del më pas pronari me një vendim arbitrar të gjykatës. Kompania u largua, vendet e punës nuk u hapën. U dëmtua zhvillimi i zonës. Ja pra, këtë të bëjnë gjykatësit e korruptuar sepse nuk të vjen njeri të investojë kur tokës i dalin nga dy-tre pronarë. Gjykatësit do të përfundojnë në burg nëse do të japin vendime të padrejta, veçanërisht lidhur me pronën”, përfundoi Rama.
