Menaxheri i shumë yjeve të futbollit, Mino Raiola, ka sulmuar ashpër në një intervistë për revistën holandeze “Quote”, trajnerin e Manchester Cityt, Pep Guardiola. Bëhet fjalë për vitin 2011 kur klienti i tij Zlatan Ibrahimovic ishte pjesë e Barcelonës dhe marrëdhëniet mes futbollistit dhe trajnerit nuk ishin aspak të mira.
“Si trajner është fantastik, por jo si njeri. Është një frikacak, një qen: bëj si them unë, jo çfarë bëj unë. I tha Zlatan-it të shkonte tek ai nëse do të kishte probleme, por më pas e injoroi dhe nuk e aktivizonte. Nuk e ka përshëndetur as kur e shitën. Ka bërë të njëjtën gjë me Maxwell, që është një djalë i mrekullueshëm, dhe unë i thashë Zlatan ta parkonte Ferrari-n te vendi i trajnerit”.
Raiola, në vazhdim, ka zbuluar një prapaskenë lidhur me finalen e Champions League të 2011, kur Ibrahimovic ishte transferuar te Milan dhe Barça fitoi ndaj United: “Kam shkuar dhe e kam kërkuar në dhomat e zhveshjes të Wembley-it, por më ndali Galliani. Një fat i madh për Guardiola-n”.
