George Dionis, trajneri i APOEL-it e donte shumë Ergys Kaçen pasi i njihte cilësitë e tij dhe për këtë arsye i kërkoi klubit që ta blinin atë. Por kur gjithçka ishte duke u mbyllur tifozët kanë shkatërruar çdo gjë, pasi kanë reaguar shumë ashpër këtij transferimi.
Nuk është hera e parë që tek APOEL do të luajë një futbollist nga Shqipëria. Altin Haxhi kishte fanellën e verdhë të ekipit qipriot në vitin 2008-2010 dhe nuk ka pasur asnjë problem. Ndërsa me Ergys Kaçe situata është ndryshe, atyre u kujtohet fotoja me bluzën e UÇK-së gjatë një grumbullimi me kombëtaren kuqezi, çka u karakterizua nga politizimi i mëparshëm politik në Greqi.
Tifozët e APOEL kanë qenë kategorikë kundër ardhjes së shqiptarit, duke kërcënuar klubin e tyre në rast të marrëveshjes së padëshiruar me Kaçen. Ata kanë nxjerrë si shkak foton e vjetër të 25-vjeçarit kuqezi, kur pozonte me bluzën e UÇK-së, që për ta do të thotë “Shqipëria e Madhe”. Duket se klubi është vënë me “shpatulla për muri” nga i ashtuquajturi “lojtari i 12-të”.
Për këtë arsye transferimi i tij në Qipro nuk u realizua për shkak të racizmit dhe Kaçe po kthehet drejt Selanikut për të kërkuar një ekip tjetër që të luaj më shumë. Tani duket se gjasat që ai të mbyllë me Panathinaikosin në orët e fundit të merkatos rriten, pasi ka ditë që klubi nga Athina kërkon shërbimet e mesfushorit kuqezi.
