Ky është momenti frymëzues kur një nënë elefant u shpëtua kur veterinerët kryen CPR duke kërcyer lart e poshtë mbi gjoksin e saj, ndërsa vajza e saj e vogël e shikonte.
Elefanti 10-vjeçar dhe e vogla e saj kishin rrëshqitur në një kanal prej betoni, mes shiut të dendur në Nakhon Nayok, Tajlanda qendrore dje pasdite.
Elefanti kishte rënë në gropën 7 metra të thellë. Shiu i rrëmbyeshëm e bëri thuajse të pamundur nxjerrjen e elefantëve, me veterinerët që u mobilizuan për ti nxjerrë nga gropa.
Por pasi nëna goditi kokën dhe u rrëzua, jeta e saj u rrezikua papritur. Videoja tregon operacionin gjigant tre-orësh për të tërhequr elefantët në vend të sigurtë, dhe më pas për të shpëtuar nënën.
Veterinerja kryesore e parkut kombëtar, Dr Chananya Kanchanasarak tha: “Ishte e pamundur t’i afroheshe foshnjës ndërsa nëna ishte afër, kështu që ne i dhamë tre doza qetësuese, por ajo u zhvendos drejt foshnjës së saj para se të binte jashtë dhe të godiste kokën”.
Ajo shtoi se nëna “riktheu vetëdijen pasi u stimulua nga unë dhe foshnja”.
Kujdestarët e parkut kishin frikë se nëna do të thërriste për ndihmë nga tufa e 30 elefantëve aty pranë, nëse do të detyroheshin të tërhiqnin foshnjën, ndaj thirrën veterinerë.
Një ekip ngriti një pengesë të përkohshme për të parandaluar afrimin e tufës mbrojtëse dhe potencialisht të dhunshme.
Elefanti i vogël nuk mundi të dilte vetë nga kanali i kanalizimeve 7 metra, pasi shirat e dendur goditën parkun kombëtar. Një vinç u përdor për ti nxjerrë, përpara se veterinerët të vazhdonin punën e tyre.
Në momentin që nëna preku një tokë të sigurt, tre veterinerë u hodhën mbi të për ta zgjuar pasi ndikimi i rënies në kokë mund ta kishte lënduar.
Për fat të mirë, elefanti nënë u zgjua. Kujdestarët e parkut dhe veterinerët u larguan nga skena, për të lejuar ribashkimin e tyre.
Dr Chananya shtoi: “Megjithë pengesat, nëna nuk u largua nga ana e foshnjës së saj. Kjo përvojë preku zemrat tona dhe do të jetë një nga shpëtimet më të paharrueshme që kemi bërë.”
Veterinerja tha se “nëna dhe foshnja janë të sigurtë” dhe ajo falenderoi njerëzit për “punën e palodhur të të gjitha palëve të përfshira në shpëtim”.
Vlerësohet se në Tajlandë ka rreth 4000 elefantë. Rreth gjysma e tyre jetojnë në robëri, në kampe kafshësh, kopshte zoologjike dhe vende të shenjta. Pjesa tjetër mund të gjendet në parqet kombëtare të kafshëve të egra.
Burimi i lajmit: dailymail. Përshtatur nga Tirana Today
