Kryeministri i Kosovës, Ramush Haradinaj, më datën 23 maj në Gjilan në cilësinë e të nominuarit për Kryeministër të Kosovës, tha se “Shteti i Kosovës duhet me ua dhanë shtetësinë, të gjithë qytetarëve të Preshevës, Bujanocit dhe Medvegjës’’.
Kurse më 11 tetor 2017, Presidenti i Kosovës, Hashim Thaçi në takimin që u mbajt gjatë vizitës së Presidentit shqiptar, Ilir Meta në Prishtinë, u shpreh se “E vetmja shpresë në këtë moment për qytetarët e Kosovës që të lëvizin lirshëm dhe në përputhje me Kushtetutën e Shqipërisë t’u jepet shtetësia shqiptare qytetarëve të Kosovës’’.
Kryeministri i Kosovës, iu premton shtetësinë, të gjithë qytetarëve të Preshevës, Bujanocit dhe Medvegjës. Ndërsa presidenti kërkon që t’u jepet shtetësia shqiptare të gjithë qytetarëve të Kosovës.
Në këtë mes qytetarët e Medvegjës, Bujanocit dhe Preshevës, cila duhet t’i pajisë me nënshtetësi Prishtina apo Tirana zyrtare? Kjo është droja që ne mund të mbetemi qytetarët të askujt.
Këto deklarata janë tejet të pamatura. Të gjitha këto kanë shpërfaqur dallimet edhe midis kryeministrit dhe presidentit të Kosovës. Diskursi politik është i pa harmonizuar dhe larg koordinimit. Në radhë të parë, është i padrejtë qëndrimi i përbashkët ndaj kësaj krahine të mbetur padrejtësisht nën administrimin e Serbisë.
Dy presidentët, dy kryeministrat, dy kryeparlamentarët, duke përfshirë dy qeveritë dhe dy parlamentet, do të duhet të trajtojnë në mënyrë unike Medvegjën, Bujanocin dhe Preshevën e jo me dallime.
Vazhdimisht kemi kërkuar që na duhet një qëndrim i përbashkët. Prandaj, Prishtina dhe Tirana zyrtare duhet të mbajnë një qëndrim për të gjitha çështjet e shqiptarëve që jetojnë në hapësirat tona etnike apo jashtë tyre.
Ndërkohë që Serbia është duke fshirë adresat e vendbanimeve nga regjistrat amë, Prishtina dhe Tirana zyrtare duhet të mbajnë një qëndrim të prerë.
Ne shqiptarëve të Medvegjës, Bujanocit dhe Preshevës, herë na premtohet nënshtetësi e Kosovës nga kryeministri dhe presidenti ndërkaq kërkon që të gjithë kosovarët të pajisen me pasaporta të Shqipërisë. Po ne shqiptarët e Medvegjës, Bujanocit dhe Preshevës të kujt jemi, kur nuk na pranon as vetë Serbia që ka obligim të na pajisë me dokumente si kërkesë për të përmbushur standardet e Bashkimit Evropian. Të mos harrojmë se qytetarët nga kjo krahinë një pjesë jo e vogël kanë mbetur sikur të jenë banorë të askujt, pasi nuk janë të pajisur me dokumente të asnjë shteti. TIRANA TODAY
