Fasha 800 KW për të gjithë konsumatorët familjarë, nuk do të hyjë në fuqi më 1 tetor. Duket se kryeministri është tërhequr nga rritja e çmimit të energjisë. Kreu i qeverisë tha se burimet tona energjitike varen nga reshjet. Dhe se sistemi ynë energjitik me hidrocentral plot e përplot plotëson 75% të nevojave tona për energji. Kryeministri u shpreh i vendosur për të mbrojtur konsumatorin!
“Burimet tona energjitike varen nga reshjet. Sistemi ynë energjitik me hidrocentral plot e përplot plotëson 75% të nevojave tona për energji.
Ne po ecim sipas planit për të plotësuar nevojat 100% të vendit. Por hë për hë nuk i plotësojmë dot të gjitha nevojat dhe do të vazhdojmë të dalim në tregun ndërkombëtar aty ku goditen të gjitha vendet e Evropës nga çmimet e larta.
Unë dhe qeveria jemi këtu për të mbrojtur çmimin, dhe për të mos lënë asgjë pa bërë, që barra faktike dhe psikologjike e kësaj lufte dhe inflacionit që ka sjellë të lehtësohet sa më shumë. Jam këtu për t’ju thënë që kam një lajm pozitiv.
Ditët e fundit kemi pasur përmirësim të nivelit në Fierzë, dhe presim që të materializohen parashikimet për reshje të tjera. Në këto kushte, bazuar në një analizë të detajuar si dhe angazhimin e plotë për të shfrytëzuar çdo mundësi që krijohet, ne vendosëm që aplikimi i fashës 800 kWh të mos hyjë në fuqi në muajin tetor”.
