Qeveria shqiptare ka paralajmëruar furtunë në administratën publike. Në një raport të Ministrisë së Drejtësisë, thuhet se në të gjitha këto institucione janë kryer rreth 354 auditime.
Po kështu kanë rezultuar me shkelje plot 1074 zyrtarë dhe nëpunës së shtetit. Për të gjithë këta zyrtarë, janë dhënë shumë masa administrative dhe disiplinore, ndërsa për disa prej tyre ka pasur kallëzime penale.
Në kuadër të reformimit të administratës, gazeta “SOT” ka mësuar se Rama ka urdhëruar ministrat dhe deputetët që të nisin një valë të re shkarkimesh. Në fokus duhet të jenë militantët e LSI.
Kjo porosi e Ramës, ka ardhur edhe nga fakti që janë gjetur mijëra shkelje në administratë, sidomos në drejtoritë e drejtuara nga LSI, siç janë AKU, Burgjet, etj. Shefi i qeverisë ka kërkuar që punësimet të bëhen sipas meritës. Nga ana tjetër, gazeta mësoi se auditi nëpër institucione do të vijojë, duke dhënë sinjale se mazhoranca qeverisëse është e vendosur që të pastrojë administratën publike njëherë e mirë nga parazitët.
