Pas vendimit të qeverisë për të mbyllur kolegjin “Mehmet Akif”, nxënësit dhe mësuesit janë ngritur në protestë. Të pajisur me pankarta kundër qeverisë, në to shkruhej “ekselenca jemi ne”, “e ardhmja jonë, e ardhmja e kombit”, “arsimi është i depolitizuar”.
“Kur marrim ne medalje nëpër botë, krenoheni me ne kolegjistët. Nëse doni të shkatërroni një vend, nuk është e nevojshme bomba, por të shkatërroni arsimin. Kështu na erdhi si bombë ky lajm. Dje i dhatë goditje fatale arsimit. Sot jemi më të vendosura se kurrë, ne nuk dorëzohemi. Shkollën s’mund të na e merrni. Anuloni vendimin kundër shkollës “Mehmet Akif”, tha një prej nxënësve.
Sakaq, mësuesit e kolegjit u shprehën se vendimi u ka shkuar pa pritur dhe pa kuptuar. “I këshilloj të gjithë, ministren, kryeministrin, që të mësojnë se si mësohet mësonjëtorja, gjuha shqipe”, tha mësuesi.
Qeveria vendosi dje mbylljen e kolegjit turk në Tiranë “Mehmet Akif Ersoy”. Ky institucion funksiononte në Shqipëri që nga viti 1996, dhe është ndër të parat shkolla të mesme private të hapura në vend pas viteve 90’.
Vendimi i qeverisë ngarkon kolegjin që të mbulojë të gjitha shpenzimet për kryerjen e procedurave për transferimin e nxënësve. Gjithashtu, në vendim kolegjit i kërkohet që të kthejë pagesat e kryera nga prindërit për pjesën e papërfunduar të shkollimit.
