Qeveria ka vendosur që të japë ndihmë financiare për familjen e Klodian Rashës.
Mësohet se familja do të marrë 8-fishin e pensionit social, dhe do t’i jepet babait të 25-vjeçarit.
Siç thuhet në vendimin e Këshillit të Ministrave botuar në Fletoren Zyrtare, një tjetër element që bie në sy, është fakti se aty shkruhet se vrasja ishte aksidentale.
Në një tjetër vendim, duke marrë shkasë nga kjo ngjarje e rëndë, Qeveria ka bërë një shtesë në ligjin për “Sigurimet Shoqërore”.
“Familja, e cila ka humbur aksidentalisht pjesëtarë të saj, si pasojë e veprimeve të kryera gjatë ushtrimit të detyrës nga punonjës të organeve ligjzbatuese, përfiton trajtim të veçantë financiar deri në masën e tetëfishit të pensionit social. Trajtimi i veçantë financiar dhe anëtari që përfiton në emër të familjes, përcaktohet me vendim individual të Këshillit të Ministrave dhe financohet nga buxheti i shtetit”, thuhet në vendimin e qeverisë.
Ky vendim, vjen 6 ditë pas ekzekutimit të të riut nga një efektiv policie, për shkak se theu orën policore.
Ekzekutimi i Rashës shkaktoi një reagim të fortë popullor. Në orët e para të 8 dhjetorit, në ditën e rinisë, ai u qëllua për vdekje nga një efektiv i ”Shqiponjave”, pasi kishte thyer orën policore.
Për këtë arsye, Ministri i Brendshëm, Sandër Lleshaj dha dorëhqejen, por protestuesit kërkojnë edhe largimin e Drejtorit të Përgjithshëm të Policisë së Shtetit, Ardi Veliu.
