Kryetarja e LSI-së Monika Kryemadhi, gjatë vizitës së saj në SHBA, ku zhvilloi disa takime me komunitetin shqiptar atje, u ndal edhe në Miçigan, në Teqen e parë dhe të vetmen Bektashiane “Baba Rexhep” në Detroit.
Siç njofton zyra e shtypit, Kryemadhi u mirëprit nga Dervish Eliton Pashaj, kryetari i degës së Vatrës në Michigan, Dritan Demiraj, Mondi Rakaj, Ervis Zholi, administrator i Nova Media dhe përfaqësues të komunitetit shqiptar.
“Si kryetare e LSI, u angazhova për të pasur në programin tonë, por edhe të opozitës së bashkuar angazhime të qarta për të ndihmuar komunitetet shqiptare kudo që ata jetojnë. Theksova mungesën e seriozitetit të qeverisë ndaj diasporës.
Qeveria shqiptare e trajton diasporën vetëm si fasadë për takimet groteske, si ai i fillimvitit, me shpenzimet e saj, mund të pajiseshin me abetare dhe tekste të tjera pjesa më e madhe e diasporës shqiptare jo vetëm në SHBA. Përçarja dhe trajtimi i shqiptareve me dy standarde është e vetmja “meritë” e qeverisë shqiptare”, shkruan kryetarja e LSI-së.
