Ministri në detyrë i Punëve të Jashtme, Gent Cakaj ka kërkuar dorëzimin e pasaportave diplomatike për 350 persona, pasi sipas tij, janë në kundërshtim me ligjin. Ai ka apeluar ndaj deputetëve, gjykatësve që nuk e kanë kaluar Vettingun, e deri tek shoqëruesit e personaliteteve, që ti dorëzojnë ato pasaporta, në të kundërt do të shpallen të pavlefshme.
Cakaj tha se rregullimi i ligjit për pasaportat diplomatike do fuqizojë edhe pasaportat e Republikës së Shqipërisë përmes liberalizimit të vizave, me një numër shtetesh më shumë se ai aktual.
“Shqipëria ka dyfishin e pasaportave diplomatike krahasuar me vendet e fuqishme evropiane. Kjo nuk është një krahasim për qëllime stilistike, por ky është një fakt.
Në shkelje flagrante edhe të këtij kuadri ligjor dhe admistrativ sot në Shqipëri ka më shumë se 350 persona që mbajnë pasaportë diplomatike në shpërputhje me ligjin, që hyjnë e dalin si personalitete me status të veçantë.
Deputetë të mandateve të kaluara, gjykatës që nuk e kanë kaluar Vettingun, deri tek shoqërues të personaliteteve të njohura në Shqipëri.
I ftoj publikisht të gjithë të bëjnë dorëzimin e pasaportave diplomatike, sepse pasaporta e tyre diplomatike do të bllokohet, dhe do të shpallet e pavlefshme”.
