Në një familje me 4 persona, konsumi ditor i qeseve plastike është 8 për çdo person. Ndërkohë një pjesë e këtyre qeseve hidhen në mbeturina, e shumë të tjera përfundojnë në natyrë, ku për tu vetëasimiluar duhen rreth 200-300 vite.
Por, prej fillimit të muajt korrik, qeset plastike janë të ndaluara të përdoren. Sipas ministrisë së Mjedisit, ky vendim konsiston në 3 pika kryesore, rritja e trashësisë së qeses plastike, të kenë aditivë biodegradues, pra lëndë që nxisin vetëshkatërrimin për një periudhë 36 mujore dhe të jenë të gjurmueshme.
Qytetarët të pyetur nga Tirana Today thonë se kjo nismë është shumë e mirë për mjedisin, por që do të ndikojë tek xhepat e tyre.
“Do t’i sistemojmë produktet që blejmë në një ose dy, sepse ndryshe nuk ia dalim dot.”
“Po paguajmë, nuk kemi çfarë të bëjmë. Sidomos në markete që nuk diskutohet. Për ne si konsumator nuk është pozitive kjo nismë, sepse të marrësh vezët, domatet, të gjitha me një vend; nuk është normale.”
Ndërkohë tregtarët të cilët kanë nisur përdorimin e qeseve të reja, përsëri vazhdojnë të shesin produkte me ato të vjetrat, pasi nuk mund t’i hedhin. Sipas disave, kosto e qeseve të riciklueshme është e lartë, krahasuar me ato të mëparshme. Si edhe qytetarët më shumë nuk paguajnë dhe kështu ata kanë humbje.
“Unë i them që këtë qesen e kam blerë 10 lekë dhe po aq do ta shes, kjo i bën të marrin qese nga shtëpia e tyre. Sepse ndryshe nuk i leverdis. Ne dalim me humbje, por nuk kemi çfarë të bëjmë. E rëndësishme është që njerëzit të mësohen pa qeset plastike të dëmshme.”
“Këto të vjetrat do t’i hedhim. Nëse na lënë të punojmë deri sa t’i mbarojmë, në të kundërt nuk kemi çfarë të bëjmë.
T’i bësh me lekë, nuk të vjen njeri në derë të dyqanit, t’i bësh pa lekë del me humbje shumë. Nuk dimë dhe ne çfarë të bëjmë,”-shprehen tregtarët. TIRANA TODAY
