Për popullin e po kështu për bizneset, një ndër shqetësimet që tashmë është parashtruar dhe ka marrë zgjidhje, lidhet me kreditë. Teksa vetë-izolimi vijon, problemi mbetet si do paguhen kreditë, kur frika ekziston për mos marrjen e rrogës.
Në një intervistë ‘live’ në News24, Rama deklaroi se shtyrja për 1 vit e kredive, do të thotë që ne t’i lëmë bankat në pikë të hallit. Ai bëri dhe një paralajmërim për bizneset e mëdha, ndërsa shtoi se kreditë janë shtryrë me 3 muaj. Kryeministri Edi Rama njoftoi dje se firmosi urdhrin për shtyrjen e kësteve të kredive. Kreu i qeverisë publikoi urdhrin në “Facebook”, ku thuhet se kreditë do të shtyhen deri më 31 maj 2020, për shkak të situatës së krijuar nga koronavirusi.
“Ne kemi marrë parasysh gjithçka që mund të bëjmë. Kreditë janë shtyrë 3 muaj, ata t’iu drejtohen bankave. Shtyrja për 1 vit e kredive do të thotë që ne t’i lëmë bankat në pikë të hallit. Për çfarë arsye duhet të shtyjmë pagesën e taksave të kompanive të mëdha? Me çfarë do ta financojmë ne luftën, nëse shtyjmë pagesat e kompanive të mëdha? Taksat janë detyrime që janë të pashmangshme, kështu që këto janë nga ato sugjerimet që thashë, dëshira në kohë paqeje, nuk janë sugjerime për kohë lufte.
Kjo tregon se disa prej këtyre njerëzve të nderuar, nuk e kanë marrë vesh që jemi në luftë, nuk është bërë deti kos… Unë jam ai që në kohë paqeje akuzohem si i oligarkëve padrejtësisht. Dua të jem i drejtpërdrejt, e konsideroj të turpshme që ata njerëz që kanë ngritur biznese të mëdha, të akuzohen dhe baltosen siç janë akuzuar dhe baltosen por është koha t’iu them atyre se jeni të parët që duhet të sakrifikoni për popullin shqiptar. Nëse ju nuk sakrifikoni, nuk ka më një vend ku ju mund të vazhdoni të bëni biznes rehat”.
