Një i ri vlonjat është vënë në pranga, pasi qarkullonte me një sasi lënde narkotike të cilën e kishte të fshehur në makinë. Bëhet fjalë për shtetasin Klajdi Dulellari (Kapllani) banues në Vlorë, 21-vjeç. Policia gjeti në makinën e tij “Audi”, 7 kilogramë e 500 gramë lëndë e dyshuar narkotike cannabis sativa.
“Shërbimet e policisë, gjatë kontrollit të ushtruar në automjetin tip “Audi” në përdorim nga ky shtetas, në lagjen “Isa Boletini”, gjetën dhe sekuestruan në cilësinë e provës materiale 7 kg e 500 gramë lëndë të dyshuar narkotike cannabis sativa”, njofton policia. Arrestimi u bë në kuadër të operacionit policor të koduar “A2”, për goditjen e veprimtarisë kriminale në fushën e narkotikëve. Lidhur me këtë rast, materialet hetimore i kaluan Prokurorisë pranë Gjykatës së Shkallës së Parë Vlorë, për veprën penale “Prodhimi dhe shitja e narkotikëve”.
