Maturantët do të zhvendosin protestën në Durrës, e ndërsa janë të pakënaqur me formatin e tezës të gjuhës shqipe dhe letërsisë. Sipas tyre, shumë pyetje kanë qenë jashtë programit orientues. Ata janë ankuar sot për modelin e testit, e ndërsa kërkojnë zgjerim të pikëve.
Nga ana tjetër, Ministrja e Arsimit, Besa Shahini fajëson opozitën, si bashkëpunuese në protestën e sotme.
Në kohën kur është marrë vendimi për një shtrirje më të gjerë të protestave nga maturatët, Ministria e Arsimit ka marrë vendimin e radhës. Dy provimet e tjera do zgjasin 2.5 orë dhe jo 2 orë.
Njoftimi
Qendra e Shërbimeve Arsimore njofton se Testi i Maturës Shtetërore 2020 është mbështetur tërësisht mbi programin e reduktuar. Në lidhje me pretendimin e ngritur për “pyetje jashtë programit”, nënvizojmë se NUK KA ASNJË PYETJE jashtë këtij programi. Në këtë kuadër, ftohen nxënësit të sjellin pranë QSHA ankesat konkrete për pyetjet që mendojnë se janë jashtë këtij programi në mënyrë që të adresohen duke i hequr nga vlerësimi.
Në lidhje me cut-off-in, në përfundim të marrjes së rezultateve, QSHA do të shikojë kurbën e shpërndarjes së pikëve. Bazuar mbi këtë kurbë, nëse do të vihet re zhvendosje të saj (në rast se ka pasur ndonjë grup pyetjesh me një shkallë më të lartë vështirësie), atëherë do të shikohet mundësia e ri-shpërndarjes së peshave të pikëve në test. I gjithë ky proces do të analizohet profesionalisht dhe në mënyrë të kujdesshme nga specialistët e fushës në mënyrë që të bëhet më e mira për maturantët.
Njëkohësisht, duam të shprehim se testi nuk ka asnjë gabim shkencor dhe mënyra se si hartohet përjashton çdo mundësi që të ketë gabime – qoftë në përmbajtje dhe qoftë në përfshirjen e koncepteve jashtë programit.
Për sa i përket dy (2) testeve të ardhshme të Maturës Shtetërore, bëjmë me dije se ata do të jenë me kohëzgjatje 2.5 orë dhe me alternativa, paçka se edhe kohëzgjatja prej 2 orësh e parashikuar në fillim është më se e mjaftueshme në zhvillimin e provimit.
