Presidenti i SHBA-ve, Donald Trump është shprehur se po e “konsideron seriozisht” mundësinë e një urdhri ekzekutiv për të futur në censusin e vitit 2020 edhe pyetjen mbi shtetësinë.
Gjykatat i kanë dhënë një afat kohor Trump për ta sqaruar nëse kjo pyetje do ishte apo jo pjesë e këtij censusi për regjistrimin e popullsisë. Por Trump akoma nuk ka një përgjigje vendimtare teksa shprehet se kjo është një nga 4 ose 5 alternativat që ai po shqyrton. Edhe pse qeveria ka filluar me procesin e printimit të pyetësorit, Trump deklaroi se zyrtarët mund të jenë në gjendje të bëjnë një shtesë në pyetësor, në një moment tjetër.
Vendimi për përfshirjen e pyetjes së shtetësisë në censusin që bëhet çdo 10 vjet në Amerikë,ka sjellë shumë debate dhe mosmiratime teksa Gjykatat Federale dhe disa shtete e kanë sfiduar vendimin e administratës së Trump. Ndërkohë që avokatët e qeverisë po punojnë të japin një arsyetim të besueshëm mbi këtë vendim që ka krijuar kaq shumë debat.
Kujtojmë se Gjykata e Lartë votoi kundër vendimit për të përfshirë këtë pyetje në censusin e 2020-s, me arsyetimin se asnjë shpjegim i qartë rreth arsyeve se pse kërkohet kjo pyetje, nuk është bërë nga qeveria.
