Presidenti i Rusisë, Vladimir Putin ka habitur me deklaratën e tij, teksa tha se vaksinat ruse kundër koronavirusit, janë po aq të besueshme sa armët kallashnikov.
Kreu i Kremlinit e bëri deklaratën gjatë një video konference ditën e djeshme me Zëvendës Kryeministren Tatyana Golikova, shkruan BBC.
Zyrtarët shëndetësorë në Rudi, regjistruan një version me dozë të vetme të vaksinës Sputnik V të Enjten, i quajtur Sputnik Light.
Krahasimi i Putinit i referohej armës së epokës së Bashkimit Sovjetik që mbetet e njohur dhe e përdorur gjerësisht edhe sot.
Ai po citonte një koment të bërë fillimisht nga një mjek austriak në fillim të këtij viti në lidhje me efikasitetin e vaksinës.
“Vaksinat tona, që janë të njohura tashmë, bashkë me Sputnik Light që iu bashkua listës, janë të bazuara në teknologji dhe platforma të përdorura prej shumë vitesh. Janë të azhornuara dhe vaksinat tona janë më të besueshmet e të sigurtat. Siç ka thënë një specialist evropian: ato janë të besueshme po aq sa një kallashnikov. Nuk e themi ne këtë, e ka thënë një specialist evropian. Mendoj se ai ka të drejtë sepse vaksinat tona janë të thjeshta dhe të sigurta, ashtu si kallashnikovi”, tha Putin.
