Presidenti rus Vladimir Putin akuzoi Evropën dhe SHBA-në për shkak të sanksioneve të vendosura ndaj Rusisë dhe Bjellorusisë. Madje, ai paralajmëroi se SHBA rrezikonte të ndiqte rrugën e Bashkimit Sovjetik, shkruan Euronews.
“E dini cili është problemi? Do t’jua them si ish-qytetar i ish-Bashkimit Sovjetik. Cili është problemi i perandorive? Ata mendojnë se janë aq të fuqishëm sa mund të përballojnë gabime të vogla. Por numri i problemeve po rritet. Vjen një kohë kur ato nuk mund të trajtohen më. Dhe Shtetet e Bashkuara, me një ecje të sigurt, me një hap të vendosur, po shkojnë drejt në rrugën e Bashkimit Sovjetik”, tha Putin.
Gjatë fjalës së tij në një forum ekonomik në Shën Petersburg, Putini diskutoi marrëdhëniet e Rusisë me SHBA përpara takimit me Presidentin Joe Biden, duke i përshkruar ato si “në një nivel jashtëzakonisht të ulët”.
“Ne nuk kemi ndonjë mosmarrëveshje me SHBA. Ata kanë mosmarrëveshje me ne. Ne do të diskutojmë marrëdhëniet dypalëshe. Unë mendoj se duhet të përpiqemi të gjejmë një mënyrë për t’i rritur këto marrëdhënie. Për momentin ato janë në një nivel jashtëzakonisht të ulët”, u shpreh presidenti rus.
Marrëdhëniet midis Rusisë dhe SHBA janë në nivelet më të ulëta që prej periudhës së Luftës së Ftohtë, për shkak të aneksimit të Krimesë nga Moska në vitin 2014, akuzave për ndërhyrje ruse në zgjedhjet e 2016-ës dhe sulmet kibernetike që zyrtarët amerikanë pretendojnë se kishin origjinë ruse.
