Presidenti rus Vladimir Putin e kritikoi ashpër sulmin perëndimor ndaj tre impiante të programit të armëve kimike në Siri. Putin tha se ishte një akt i pastër agresioni. Me gjithë kërcënimet se do të rrëzonte raketat amerikane, ushtria ruse “nuk ngriti as gishtin” për të frenuar sulmin dhe çdo raketë e aleatëve goditi objektivin.
As ushtria siriane, duke parë zbulimin e blofit rus, nuk tentoi të ndalte sulmin e 3 fuqive të mëdha, megjithëse televizionet shtetërore në vend thanë se 70 raketa u rrëzuan.
Sulmi aleat padyshim që nuk i jep fund luftës së gjatë e të përgjakshme civile në Siri, por të paktën dërgon një mesazh se mbase perëndimi do të angazhohet disi më shumë për këtë qëllim.
Ekspertët thonë se pas mesazhit të Trump duket se nuk do të ketë sulme të tjera, të paktën derisa presidenti sirian Bashar al Asad të bëjë ndonjë lëvizje tjetër “force”. Pavarësisht se forca e sulmit është vënë në diskutim, fitorja politike duket mjaft e qartë.
“Faleminderit Francës dhe Britanisë për urtësinë dhe fuqinë e ushtrive të tyre të shkëlqyera. S’mund të kishim pasur rezultatet më të mira. Misioni u krye”, – tha Trump.
