Presidenti rus Vladimir Putin ka kërkuar përdorimin e “vullnetit të mirë”, për të zgjidhur konfliktet në mbarë botën, pa iu referuar luftës në Ukrainë. “Të gjithë kanë vullnet të mirë, dhe ne duhet ta përdorim këtë vullnet të mirë në maksimum” në zgjidhjen e çdo konflikti, tha Putin duke folur me liderët në samitin e Komonuelthit të Shteteve të Pavarura (CIS).
“Ne duhet të përpiqemi të gjejmë mënyra për të dalë nga situata aktuale, kudo që ajo lind”, shtoi ai. Putin tha gjithashtu se Rusia “mirëpret përpjekjet ndërmjetësuese të kujtdo, për sa kohë që ato synojnë qetësimin e situatës, në dobi të të gjithë pjesëmarrësve në konflikte”.
“Kjo vlen edhe për partnerët tanë nga SHBA dhe Evropë”, shtoi ai. Në aktivitetin në kryeqytetin e Kazakistanit, Astana, marrin pjesë liderët e Azerbajxhanit, Armenisë, Bjellorusisë, Kazakistanit, Kirgistanit, Rusisë, Turkmenistanit, Taxhikistanit dhe Uzbekistanit.
Që nga fillimi i pushtimit të Ukrainës në shkurt, Kremlini ka prishur marrëdhëniet diplomatike me Kievin dhe aleatët e tij perëndimorë. Në fillim të këtij muaji, presidenti ukrainas Volodymyr Zelensky nënshkroi një dekret që përjashtonte zyrtarisht negociatat e mundshme me Putinin.
Ai erdhi si përgjigje ndaj njoftimit të Putinit se ai do të aneksonte ilegalisht katër rajone në Ukrainë, një veprim i dënuar gjerësisht nga udhëheqësit ndërkombëtarë.
Burimi i lajmit: CNN. Përshtatur nga Tirana Today
