Në emisionin “Me zemër të hapur” ditën e sotme është trajtuar historia e Orjanës, një vajzë 32 vjeçe, nënë e një djali 7-muajsh, me një të shkuar të dhimbshme. Orjana tregoi se nëna dhe vëllai i saj kanë kryer vetëvrasje. Ndërsa babai i saj humbi jetën në rrethana që nuk dihen. Pasi humbi njerëzit e dashur, shqiptarja emigroi në Itali.
Aty u dashurua dhe u martua me një shtetas italian me emrin Igor. Kur Orjana u kthye në Shqipëri për të bërë disa dokumente, Igori i ndërpreu të gjitha kontaktet me të dhe nisi një bashkëjetesë tjetër, por Orjanës nuk ja ka dhënë ende divorcin.
Pas kohë më vonë, Orjana u lidh me Polin, shtetas amerikan që punonte në ambasadën amerikane në Tiranë. Pas 3 muajsh ajo mbeti shtatzënë, por kur ja dha këtë lajm Polit, ai e braktisi.“Unë mendoja se nuk mund të bëja fëmijë. Nuk e prisja të ngelja shtatzënë. Shkoja në banesën e Polit, e kishte përballë liceut. Kur ai ikte në punë i pastroja shtëpinë, laja rroba, i hekurosja rrobat. Kur mbeta shtatzënë dhe i tregova ai u zhduk. Shkova tek banesa e tij por roja i pallatit më tha se nuk banonte më aty. Nuk e di ku është tani”, tregoi Orjana.Kur ishte 7 muajshe shtatzënë, shqiptarja shkoi në Piacenza, Itali për të rinovuar letrat sepse zyrtarisht figuronte e martuar me shtetasin italian, Igorin.
Atje e zunë dhimbjet e parakohshme të shtatzënisë dhe u shtrua në spital. Pas 2 muajve solli në jetë djalin dhe u strehua nga shërbimi social. Mirëpo më 8 maj, Orjanës ja marrin djalin në shërbimin social me pretendimin se ajo nuk është e aftë ta rrisë.“Fëmijën ma kanë marrë në maj dhe nuk më lënë ta shoh më. Në 8 maj unë dola me djalin dhe më qëlluan në kokë e përfundova në spital. Kur dola nga spitali fëmijën e kishte marrë asistentja sociale dhe tani nuk ma lënë më sepse thonë jam e papërshtatshme. Nuk e di ku është djali. Më kanë thënë që është në komunitet por nuk e di ku është. Nga psikologja e qendrës është bërë një raport pozitiv për mua, por nuk është marrë parasysh. Unë kujdesesha për djalin dhe deri atë ditë nuk ishim ndarë kurrë. Djali im ka edhe disa probleme shëndetësore dhe kujdesesha në maksimum për të. Jam e pashpresë. I bëj apel shtetit shqiptar pasi nuk kërkoj asgjë, vetëm të më ndihmojnë të marr djalin”, u shpreh Orjana.Emisioni “Me zemër të hapur” kontaktoi me avokaten për të drejtat ndërkombëtare Natasha Shehu e cila i premtoi Orjanës që do ta ndihmonte falas për të marrë djalin. Avokatja u shpreh se Orjana i takon të marrë dokumentet e qëndrimit për shkak të martesës me italian dhe faktit që djalin e ka lindur në Itali.
Burimi: Balkanweb
