Shtetasi Xhevi Dervishi u prangos sot së bashku me pedagogun Alket Dino, nga Specialistët për Hetimin kundër Korrupsionit në Drejtorinë Vendore të Policisë Korçë, pasi akuzohen se u merrnin para studentëve përkundrejt notave kaluese.
Sikundër njoftonte policia, ai bënte rolin e sekserit. Dervishi bënte një jetë luksi me puro e kostume zyrtare, ndërsa punonte edhe në një agjenci imobilare.
Një ditë më parë, me anë të një statusi në Facebook, ai përcillte mesazhin se duhet të punosh fort dhe të jesh i sjellshëm që të të ndodhin gjëra të mëdha në jetë.
“Puno fort, ji i sjellshëm dhe gjëra të mahnitshme do të ndodhin!
Mirëmëngjes dhe ditë të mbarë!”, shkruan ai bashkëngjitur fotos së shpëndarë në rrjetin social.
Profesori bashkë me sekserin, janë kapur në afërsi të Fakultetit të Shkencave Sociale me një sasi prej 300 eurosh dhe 50.000 lekësh, të cilat nga hetimet e kryera dyshohet se i kanë përfituar në mënyrë të kundërligjshme nga studentët.
