Teksa qeveria po planifikon të aplikojë punën nga shtëpia për 3 ditë të javës, si një formë për kursimin e energjisë, një studim i kryer nga Sindikata Kombëtare e Operatorëve Telefonikë tregon se puna nga shtëpia ka rritur me 20-25% faturën e energjisë elektrike për punonjësit e sektorit call center. Në këtë sektor vijon të aplikohen praktikat e ndjekura gjatë pandemisë, duke transferuar punën nga zyra në shtëpi, por kreu i sindikatës Ilir Xhemalaj thotë për “TV SCAN”, se paga e këtyre punonjësve nuk mbulon këto shpenzime të shtuara.
Xhemalaj shton se telepuna ka rritur përfitimet ekonomike për punëdhënësit, ndërsa është pasuar me humbje për punonjësit.
Kreu i sindikatës komenton dhe planet e fundit të qeverisë, duke argumentuar se kjo praktikë, jo vetëm që pasohet me një efekt të kundërt, duke rritur konsumin e përgjithshëm të energjisë, por nga ana tjetër, energjia paguhet më lirë për shkak të çmimeve të vendosur nga Enti Rregullator i Energjisë.
Këto të dhëna konfirmohen edhe nga INSTAT, pasi përdorimi i energjisë elektrike nga konsumatorët familjarë u rrit me 7,8 % në vitin 2020, në raport me 2019, që nuk ishte një vit pandemik. Ndërkohë që gjatë vitit 2021 rritja e konsumit të energjisë nga konsumatorët familjarë ishte 4.2%. Paralelisht, çmimi me të cilin e paguajnë energjinë familjet është 9.5 lekë/kwh, një vlerë që në krahasim me çmimet e energjisë për biznesin është më e ulët. /SCAN
