Godina e Kontrolli të Lartë të Shtetit do të rikonstruktohet me një fond shtesë si pjesë e buxhetit të vitit 2017. Këshilli i Ministrave në mbledhjen e fundit vendosi se këtij institucioni i shtohet fondi prej 11 700 000 (njëmbëdhjetë milionë e shtatëqind mijë) lekë, zëri “Shpenzime kapitale, me financim të brendshëm”, për projektin “Rikonstruksion godine i KLSH-së”.
“Efekti financiar, i parashikuar në këtë vendim do të përballohet nga fondi rezervë i buxhetit të shtetit, i miratuar për vitin 2017. Ndërkohë, Ministria e Financave dhe Ekonomisë dhe Kontrolli i Lartë i Shtetit ngarkohen për zbatimin e këtij vendimi.”
Me gjithçka që ndodh në këtë vend duket se politika ka një kod marrëveshje që ky institucion të mos funksionojë. Prej shumë vitesh ky institucion nuk ka nxjerrë asnjë informacion të rëndësishëm që tregon se po punohet dhe se shteti është në kontroll të funksionarëve të saj. Për gjithë këto vite janë publikuar informacione që janë thuajse të pavlera.
Por, gjithsesi vendimi i Këshilli i Ministrave për rikonstruksionin e KLSH-së hyn në fuqi menjëherë me botimin në “Fletoren zyrtare”, u miratua në mbështetje të nenit 100 të Kushtetutës dhe të neneve 5 e 45, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar dhe të nenit 13, të ligjit nr.130/2016, “Për buxhetin e vitit 2017”, të ndryshuar, me propozimin e ministrit të Financave dhe Ekonomisë.
