Denoncimet për ekzistencën e gripit të shpendëve kanë më shumë se 10 ditë që bëhen në media, ndërkohë që autoritetet në fillim e mohonin. Por dy ditë me parë, Ministria e Bujqësisë njoftoi se sëmundja në qarkullim ishte pikërisht ajo e gripit të shpendëve. “Një kampion i marrë sot, datë 19 Mars 2022, analizuar nga laboratori i referencës së Institutit të Sigurisë Ushqimore dhe Veterinarisë, ka rezultuar pas analizimit me metodën molekulare të avancuar RT-PCR, me praninë e influencës aviare, H5N8” thuhet në njoftimin e Ministrisë.
Ngordhja masive e shpendëve ka krijuar një situatë shqetësuese në Durrës. Prej ditësh në ambientet e jashtme ndodhet një grumbull pulash të ngordhura.
Përfaqësues të dy subjekteve thonë se kanë pësuar dëm të madh financiar, me ngordhjen e rreth 1 milionë pulave.
Sipas tyre, situata është kritike, edhe për shkak të një përhapje të mundshme të ndonjë sëmundje te njerëzit, duke qenë se nga Ministria e Bujqësisë nuk është marrë asnjë masë për asgjësimin e pulave të ngordhura.
Pulat e ngordhura në Durrës vijojnë të qëndrojnë në ambient të hapur. Autoritetet nuk kanë marrë asnjë masë. Bashkia e Durrësit ka deklaruar se nuk ka vend për groposjen e tyre.
