Javën e fundit politika shqiptare me akuza dhe kundër akuza ka hapur debat se kujt i është refuzuar viza Amerikane. Veç akuzave politike del në skenë dhe një fakt tronditës. Plot 170 zyrtarë dhe ish-zyrtarë publikë të cilët akuzohen për korrupsion janë penalizuar nga ambasada amerikane në Tiranë me mohim ose revokim të vizës për në SHBA.
Të enjten u zhvillua një debat i ashpër në Parlament mes Kryeministrit Rama dhe paraardhësit të tij, Sali Berisha, për refuzim të pajisjes me vizë amerikane.
Për këtë debat reagoi dhe ambasada amerikane e cila në deklaratën e saj theksoi se “Ambasada e SHBA vazhdon të ushtrojë autoritetin e vet të gjerë për të mohuar dhe revokuar viza bazuar në informacione që tregojnë se një individ mund të jetë i papranueshëm në Shtetet e Bashkuara dhe do të vazhdojë ta përdorë këtë autoritet për të çuar përpara përpjekjet antikorrupsion në Shqipëri. Ambasada e SHBA i merr shumë seriozisht pretendimet për korrupsion dhe do të vazhdojë të shqyrtojë vizat dhe aplikimet për vizë të zyrtarëve publikë me kontroll shtesë.
Në kuadër të të njëjtës problematikë, ambasada amerikane numëron 170 raste të mohimit të vizave për zyrtarët dhe familjarët e tyre.
“Që nga revokimi i vizave të disa gjyqtarëve dhe prokurorëve në janar 2017, Ambasada e SHBA iu ka mohuar vizat më shumë se 170 zyrtarëve dhe ish-zyrtarëve dhe familjarëve të tyre. Kjo është diçka përpos përcaktimit të deputetit Tom Doshi dhe ishProkurorit të Përgjithshëm Adriatik Llalla dhe familjeve të tyre nga Sekretari i Shtetit si të pakualifikueshëm për viza amerikane përgjithmonë.
Pozicioni i Ambasadës së SHBA kundër korrupsionit dhe synimi i saj për t’iu mohuar hyrjen në Shtetet e Bashkuara zyrtarëve dhe ish-zyrtarëve të korruptuar mbetet i pandryshuar”, përfundon përgjigjen e saj zyra e shtypit e ambasadës amerikane në Tiranë.
Dy javë më parë Transparency International ka publikuar Indeksin e Perceptimit të Korrupsionit për vitin 2018 për 180 vende në bazë të nivelit të perceptuar të korrupsionit në sektorin publik, me një shkallë prej 0 deri në 100 pikë (0 tregon një vend shumë të korruptuar, 100 një vend shumë të pastër). Por, ajo vihet re është se Shqipëria ka humbur disa vende teksa renditet në pozitën e 99, nga 91 që ka qenë një vit më parë.
Në janar 2017, ambasada e Shteteve të Bashkuara revokoi vizat joemigruese për disa gjyqtarë dhe prokurorë shqiptarë, pasi ka dalë në përfundimin që këta zyrtarë nuk kualifikohen për këto viza.
Logjika të çon se meqenëse është rritur niveli i korrupsionit në Shqipëri sipas një studimi zyrtar ndërkombëtar si është Transparency International, automatikisht dhe numri i zyrtarëve shtetëror të korruptuar është shtuar akoma dhe më shumë dhe priten më shumë refuzime vizash.
