Instituti i Statistikave ka publikuar raportin “Prodhimi i Brendshëm Bruto”, sipas të cilit rezulton se Tirana është qyteti me të ardhurat më të larta për frymë në Shqipëri. Sipas statistikave, Tirana kishte të ardhura 679 mijë lekë për frymë duke shënuar një rritje prej 5.5% krahasuar me 2014-ën.
Pas Tiranës, qyteti me më shumë të ardhura për frymë renditet Fieri me 550 mijë lekë. Megjithatë, ky qark ka shënuar një rënie prej 9,6 % krahasuar me vitin 2014.
Pas Fierit renditen Gjirokastra, Durrësi, Vlora, Berati dhe Korça, ndërsa qyteti më i varfër në vendin tonë është Kukësi, me rreth 319 mijë lekë duke shënuar një rënie me 2,2 %, krahasuar me vitin 2014.
Më pas, qarqet me të ardhurat më të ulëta për frymë renditet Elbasani me rreth 351 mijë lekë duke shënuar një rënie me 0,5 % ndaj vitit 2014.
Niveli i PBB-së për frymë në të gjithë Shqipërinë u rrit me 2.63 % krahasuar me 2014-ën, pasi në 2015-ën është rreth 496 mijë lekë. Krahasuar me vitin 2014 PBB për frymë u rrit me 2,63 %.
Për sa u përket statistikave në ndarjen qendër, veri dhe jug, dy të parat kanë pësuar rritje, ndërsa jugu ka pësuar rënie të të ardhurave për fryme.
Konkretisht, në rajonin statistikor Qendër, PBB për frymë është 679 mijë lekë dhe ka pësuar një rritje me 4,8 %. PBB për frymë e këtij rajoni rezulton 20,1 % mbi mesataren e vendit.
Në rajonin statistikor Veri, PBB për frymë është 404 mijë lekë dhe ka pësuar një rritje me 5,9 %, megjithatë shqetësues është fakti se PBB për frymë e këtij rajoni është 18,5 % nën mesataren e vendit.
Në rajonin statistikor Jug, PBB për frymë është 457 mijë lekë dhe ka pësuar një rënie me 3,3 %, krahasuar me vitin 2014, ndërsa PBB për frymë e këtij rajoni, ashtu si e veriut është 7,8 % nën mesataren e vendit.
