Prej më shumë se 2 orësh vijon mbledhja e përfaqësuesve të Këshillit Politik në tryezën e Reformës Zgjedhore.
Mbledhja e sotme po zhvillohet në ambientet e Pallatit të Kongreseve dhe jo online.
Raportohet se gjatë saj ka pasur tensione.
Kujtojmë se përpara se mbledhja të niste, në media u publikuan disa e-maile që përfaqësuesit e opozitës, Petrit Vasili dhe Oerd Bylykbashi kishin dërguar në adresë të përfaqësuesve parlamentarë, Damian Gjiknuri dhe Rudina Hajdari dhe ekspertëve ndërkombëtarë që marrin pjesë në këtë proces.
Thelbi i shqetësimit të tyre ishin deklaratat e kryeministrit Rama të bëra ditën e djeshme ku ai tha se puna e Këshillit duhet të kufizohet vetëm në rekomandimet e OSBE/ODIHR-it.
“Është e qartë se ky qëndrim publik i kryeministrit është një provokim i rëndë për Këshillin Politik, që minon frymën e konsensusit”, shkruante ndër të tjera Vasili.
Kësisoj, akuzat e bëra në drejtim të mazhorancës në këto e-maile paralajmëruan një mbledhje të tensionuar, ashtu siç edhe ndodhi.
“Opinion.al” raporton se në sallë ka patur debate të ashpra mes nënkryetarit të LSI, Petrit Vasili dhe bashkëkryetarit të Komisionit të Reformës Zgjedhore, Damian Gjiknuri.
Tonet e larta mes tyre kanë bërë që mbledhja të ndërpritet.
Megjithatë ajo ka nisur sërish pas disa minutash.
Sipas rendit të ditës në vazhdim pritet të bëhet edhe vlerësimi i ekspertëve në lidhje me pyetjet që i janë bërë nga përfaqësuesit politikë nëse propozimet e bëra për sistemin prekin apo jo kushtetutën dhe si mund të adresohen si procedurë.
